Wala sang may narecord ang Philippine Coast Guard-Northern Negros Occidental, nga insidente sang pagkalumos sa tunga sang pagdagsa sang mga tawo sa baybayon sa una nga adlaw sang tuig 2026.
Suno pa kay Lieutenant Junior Grade Richelito Arbis, Assistant Station Commander sang Coast Guard Station Northern Negros Occidental, nagdeploy sila sang 12 ka mga coast guard personnel sa nagkalain-lain nga baybayon sa ciudad sang Bacolod sa una nga adlaw sang bag-ong tuig.
Ini bangod ginalauman na ang pagdagsa sang mga tawo sa pila ka mga bayabayon agud mag-outing matapos ang pagsugat sang bag-o nga tuig.
Suno kay Arbis, wala sang may narecord nga drowning incident sa mga area nga nalibot sang mga otoridad kalakip na diri ang resort sang Villaroza, Alcala, Shelton Punta TayTay kag Villa Iska ang amo nga ciudad.
Pahayag sini nga dako ang bulig sang presensya sang mga kapulisan, barangay officials kag personnel sang Disaster Risk Reduction and Management Office sa pagsiguro sang seguridad sa lugar.
Samtang, ginalauman subong nga semana nga magadamo pa ang mga pasahero sa pila ka mga pantalan bangud madamo sang mga tawo ang magapululi na kag magabalik sa ila trabaho matapos ang holiday season.
Suno kay Arbis, may yara man sang mga kapulisan nga iga-deploy sa pila ka mga port sa probinsya sang Negros Occidental.
Pahayag sini nga bisitahon ang facebook page sang Philippie Coast Guard-Northern Negros Occidental agud nga mangin aware kag makahibalo sa mga update kag pahanumdom sa mga pasahero.
Pahanumdom man sini sa mga magabyahe nga magbook sang temprano online agud nga indi na kinahanglan magpila pa.
Source: Bombo Radyo Bacolod