Ipahunong na ang paglabay ug mga basura sa syudad sa Sugbu diha sa South Road Properties kon SRP niining semanaha.
Kini maoy gipahibawo sa labaw sa Department of Public Services kon DPS sa City Hall nga si Engineer John Paul Gelasque.
Matod ni Gelasque nga ang service provider nga gikontrata sa city government nakakita na ug himuong transfer station diha sa White Road sa barangay Inayawan.
Tungod sa maong kalamboan, gipa-paspasan na sa kagamhanan sa dakbayan ang paghakot sa mga basura diha sa SRP, aron malimpyo na ang dapit nga gilabayan niini.
“For example, gahapon nag-deploy ang Pinoy Basurero (service provider) ug 97 ka trucks, hopefully by March 10, ug wala lay kakulian, kanang mga basura diha sa SRP mahurot na gyud na. Nakakita na man pud sila (Pinoy Basurero) ug transfer station sa White Road, so wala nay dumping diha sa SRP, pulos na lang ta hauling out.” Matod ni Gelasque.
Nasayran nga ang ubang establisimento diha sa SRP nangreklamo na sa ka baho sa mga basura nga gilabay diha sa nahisgutang reclaimed property.
Source: DYHP RMN CEBU