Opisyal nang inalis ng Philippine Atmospheric, Geophysical and Astronomical Services Administration (Pagasa) ang La Niña alert sa bansa.
Sa pinakabagong ulat na inilabas noong Biyernes, Abril 4, 2025, kinumpirma ng ahensya na ang Pilipinas ay kasalukuyang nasa ilalim na ng ENSO-neutral conditions.
Ang ENSO o El Niño-Southern Oscillation ay isang natural na pattern ng klima na may kinalaman sa pagbabago ng temperatura ng tubig sa central at eastern tropical Pacific Ocean. Ang mga pagbabagong ito ay may epekto sa dami ng ulan at lagay ng panahon sa maraming bahagi ng mundo, kabilang na ang Pilipinas.
Ayon sa Pagasa, bumalik na sa normal ang sea surface temperatures sa equatorial at central Pacific. Dahil dito, itinaas na sa “inactive” ang status ng ENSO Alert and Warning System—ibig sabihin, wala sa kasalukuyan, at wala ring inaasahang El Niño o La Niña sa susunod na tatlong buwan.
Sinabi rin ng Pagasa na malaki ang posibilidad na magpatuloy ang ENSO-neutral conditions hanggang sa panahon ng Setyembre hanggang Nobyembre ngayong taon.
Bagamat wala na ang La Niña, pinaalalahanan pa rin ng weather bureau ang publiko na maging maingat sa patuloy na nararanasang mainit at tuyong panahon. Ang matinding init ay maaaring magdulot ng health risks, kaya’t pinapayuhan ang lahat na umiwas sa matagal na pagkakabilad sa araw at panatilihing hydrated ang katawan.
Magpapatuloy ang Pagasa sa pagbabantay sa mga pattern ng klima at maglalabas ng mga karampatang abiso kung kinakailangan.
Source: CDF/ Sunstar