Nakatanggap ng scholarship grant mula sa University of Cebu (UC) ang second year nursing student na nag-viral sa social media dahil sa pagtulong sa isang sugatang mango vendor sa downtown Cebu City.
Ayon sa dean ng College of Nursing ng UC Banilad na si Mercy Milagros Apuhin, sasamahan niya si Angyl Faith Ababat, 21, sa opisina ni UC president Augusto Go para sa turnover ng scholarship award.
Dagdag pa ni Apuhin, ieendorso rin nila para sa isang scholarship ang kaklase ni Ababat na si Kristianne Joice Noelle Ona.
Si Ona ang tumulong kay Ababat na takpan ang mga sugat ni Bernardita Zamora para mapigilan ang pagdurugo nito.
Ang leeg ni Zamora ay nilaslas ng kanyang live-in partner sa Plaridel St. sa downtown Cebu City noong Lunes, Enero 30, 2023, dahil sa selos.
Ang mga gastusin ni Ababat para sa nursing board examination at international examination ay sasagutin din ng isang Nursing review center.
“During our capping ceremony, ito man ang importanteng event sa nursing which will happen on February 21, 2023 sa Waterfront. Amo pud ni nga i-recognize with her parents, naa syay award. Siya ang among review center, which is Power House review center, ay magbibigay ng scholarship, ang national at international board exam na libre,” sabi ni Apuhin.
Plano rin ng Philippine Nurses Association at Association of Deans of Philippine Colleges of Nursing of Cebu na bigyan ng pagkilala si Ababat.
Sinabi ni Ababat na pumunta siya sa isang medical store sa Luym kasama ang kanyang kaklase upang bumili ng mga medical supplies nang makita ang babae na sugatan sa kanyang leeg.
Sinabi niya na maraming mga nanonood ang nagtipon sa paligid ng biktima, ngunit wala sa kanila ang nag-alok ng tulong, kaya nagpasya siyang magbigay ng paunang lunas.
Si Ona, na nakasuot ng PE uniform gaya ng makikita sa CCTV footage na nag-viral sa social media, ay nakitang namigay ng gauze pad kay Ababat para pigilan ang pagdurugo ng leeg ni Zamora.
Nilinaw ni Ababat na kahit nasa ikalawang antas pa lamang ng kolehiyo ay tinuruan na sila ng paaralan kung paano magbigay ng paunang lunas sakaling maaksidente.
Sinabi ni Apuhin na ang undergraduate na si Ababat ay nagpakita na ng mga katangian ng isang nars at nakintal sa kanyang puso ang pagnanais na tumulong sa mga nangangailangan.
Pinuri ni Ababat ang paaralan at iba pang institusyon at publiko sa kanilang atensyon matapos ang kanyang ginawa.
“I am more than blessed gyud. Mao ra na ang akung maingon. Wala akong ibang salita. If naa pay words nga maingon more than thank you, mao gyud na akung maingon sir,” sabi ni Ababat sa panayam ng SunStar Cebu.
Si Ababat ay nagmula sa Baybay City, Leyte at ang pinakabata sa dalawang bata.
Ang kanyang kuya ay isang seaman, habang ang kanyang ina ay isang guro at ang kanyang ama ay isang negosyante.