Ginpanginbulahan sang Provincial Government sang Negros Occidental si Swimmer Gian Christopher Santos, miyembro sang Philippine Swimming Team nga nangin madininalag-on sa 33rd Southeast Asian Games (SEA Games) nga ginhiwat sa Bangkok, Thailand.
Si Gian nakakuha sang silver medal sa Men’s 200m Individual Medley sang amo nga torneyo.
Suno pa ni Gian, ang iya nga mga pamilya nagahalin sa Bacolod City, Escalante City, kag La Carlota City sa Negros Occidental.
Nagtapos siya bilang class valedictorian sang Tesoro High School, Las Flores, Orange County sa California USA, (Class of 2024) kag kabahin man sang top recruit sang Men’s Swimming Team sang Columbia University, kag sang Ivy League University sa New York, sa diin siya nagkuha sang iya kurso nga Political Science (Pre-Law).
Halin pa sang 2022, sang magpasakop si Gian sa Philippine Swimming Team kag ginrepresentar niya na ang Pilipinas sa madamo man nga mga torneyo pareho sang Southeast Asian Age Group Championships sa Kuala Lumpur (2022), sa diin nagdaog man siya sang silver kag bronze medal.
Kaupod man siya sang ginhiwat nga World Junior Championships sa Peru (2022) kag sa Israel (2023), World Championships sa Singapore (July 2025), kag sa World Cup Series in Illinois, USA (October 2025), sa diin siya nangin Philippine record holder.
Naga-ambisyon naman subong si Gian nga makapakigbahin sa palaabuton nga Asian Games nga pagahiwaton sa Japan sini nga September 2026.