Isang 35-anyos na lalaki ang nasawi matapos maaksidente sa Barangay Balinsasayao, Abuyog, Leyte nito lamang Enero 12, 2025.
Ang biktima ay kinilalang si alyas “Ran,” may asawa at residente ng nasabing barangay.
Ayon sa Abuyog Municipal Police Station, naglalakbay si alyas Ran mula sa Barangay Balocawehay sakay ang kanyang XRM 125 na motorsiklo patungong Barangay Balinsasayao. Sa hindi malamang dahilan, nawalan siya ng kontrol sa manibela ng kanyang motorsiklo, dahilan upang mawalan siya ng balanse at tuluyang mahulog.
Dahil sa lakas ng pagkakabagsak, nagkaroon ng mga seryosong sugat at pinsala ang biktima sa iba’t ibang bahagi ng kanyang katawan. Agad siyang dinala sa Abuyog District Hospital, ngunit idineklara siyang patay na ng dumating sa ospital, ayon sa attending physician.
Ang motorsiklo na ginamit ng biktima ay nakumpiska ng Abuyog MPS bilang bahagi ng kanilang imbestigasyon. Ang mga awtoridad ay nagsasagawa pa ng karagdagang pagsusuri at pag-iimbestiga upang malaman ang mga posibleng dahilan ng aksidente.
Ang insidenteng ito ay nagbigay-diin sa patuloy na pangangailangan ng maingat na pagmamaneho at mga pag-iingat upang maiwasan ang mga ganitong uri ng aksidente.
Panulat ni Cami