Naghinugpong ang mga drayber sa public utility jeepney (PUJ) ug mga passenger assistant officers nga lumad sa probinsya sa Capitol Grounds niadtong Abril 9 aron mokuha sa ilang 10-kilo nga bugas nga ayuda gikan sa Probinsyal nga Gobyerno, taliwala sa padayon nga pagsaka sa presyo sa krudo.
Lakip sa mga nakabenepisyo si Ramil Miñoza, residente sa Pinamungajan ug 12 ka tuig nang drayber sa Cebu City. Matod niya, dako kaayo’g tabang ang bisan unsang ayuda gikan sa gobyerno tungod sa kalisod sa panginabuhi karon. Iyang gipadayag nga ang ilang gasto sa krudo nga kaniadto mokabat lang og kapin P2,000, karon mosaka na og P6,000.
Human sa pagbayad sa boundary, mikunhod ang iyang kita ngadto sa mga P700 kada adlaw, kumpara sa una nga P1,500 hangtod P2,000. Bisan pa niini, padayon gihapon siya sa pagpamasada alang sa iyang pamilya.
Samtang, usa usab ka 80 anyos nga drayber nga si Roberto Martinez gikan sa Dumanjug ang nakadawat sa maong ayuda. Nakasinati siya og kahuyang tungod sa kainit samtang naghulat ug gitabangan paglingkod sa wheelchair. Iyang giingon nga tungod sa taas nga presyo sa krudo, mikunhod pag-ayo ang iyang kita ug napugos siya sa paghunong sa pagpamasada niadtong Marso 24 human makadala lamang og P225.
Miingon si Gobernador Pamela Baricuatro nga nagpadayon ang probinsya sa pagpatuman og mga programa aron matabangan ang mga sektor nga naapektuhan. Gipasiugda niya nga adunay igo nga suplay sa bugas ug krudo sa probinsya ug gihimo sa gobyerno ang tanan aron matabangan ang katawhan nga naglisod.
Ang distribusyon sa bugas sa Capitol Grounds magpadayon pa ug ipahigayon sa tibuok adlaw. Ang programa gipahigayon sa pakigtambayayong sa Land Transportation Franchising and Regulatory Board (LTFRB) 7, nga maoy naghatag sa listahan sa mga kwalipikadong benepisyaryo. Ipatuman kini pinaagi sa mga hugna, ug gihangyo ang mga drayber nga makigkoordinar sa ilang operators alang sa iskedyul ug claiming number.
Source: https://www.facebook.com/share/p/16jQGV48gb/
(CEBU PROVINCE FB PAGE)
Panulat ni Pat Flora Mae Asarez