Bilang paghahanda sa darating na halalan sa Mayo 12, nakipagtulungan ang Diocesan Electoral Board (DEB) ng Dioceses ng Dumaguete sa iba’t ibang paaralan upang ipatupad ang programang Tibok Pinoy, na naglalayong turuan ang mga botante kung paano pumili ng tamang kandidato.
Ayon kay Msgr. Julius Perpetuo Heruela, DEB coordinator at pinuno ng Parish Pastoral Council for Responsible Voting (PPCRV), malaking bahagi ng programa ang pakikipagtulungan sa mga paaralan upang maabot ang mas maraming kabataan at unang beses na boboto.
“The partnership will be between the DEB/PPCRV and these schools to bring the Tibok Pinoy voters’ empowerment program to their institutions and in their activities,” ani Heruela.
Isa sa mga pangunahing paraan ng pagpapatupad ng programa ay ang pagsasama ng Tibok Pinoy sa National Service Training Program (NSTP), kung saan karamihan sa mga mag-aaral ay nasa wastong edad na para bumoto. Bukod dito, tatalakayin din ito sa ilang asignatura tulad ng Values Education at Religion, at magbibigay ng mga babasahin na maaaring gamitin bilang gabay sa pagboto.
Kabilang sa mga paaralan na lumahok sa programa ay ang St. Paul University-Dumaguete, Silliman University, Foundation University, Colegio de Sta. Catalina de Alejandria, Metro Dumaguete College, Asian College of Science and Technology, at AMA Computer College, sa pangunguna ng kanilang student governments.
Samantala, makikilahok din sa opisyal na pagpirma ng kasunduan ang Rotaract Young Leaders Forum sa isang programa na gaganapin sa Marian Priests Center sa loob ng Dumaguete Cathedral compound sa Miyerkules.
Ang Commission on Elections (COMELEC) ay dadalo rin bilang opisyal na saksi sa kasunduan.
Source: PNA