Katima han pira ka dekada nga Pag atubang ha problema ha insurhensiya pormal na nga igin deklara nga Stable Internal Peace and Security Condition an bungto han Matuguinao, Samar.
Gin buhat an deklarasyun pinaagi ha simple nga seremonya nga gin tambungan han mga opisyal han lokal nga pan gobyernuhan ha panguna ni Mayor Aran Boller kaupod an 8th Infantry Division han Philippine Army, Philippine National Police (PNP), ngan iba pa nga buhatan han gobyerno.
Sumala kan Mayor Boller, an deklarasyon in tinikangan ngadto han hul-os nga kamurayawan ngan kauswagan han bungto.
Ini in resulta han mahugot nga paningkamot han lokal nga pangobyernohan, kasundalohan, kapulisan, ngan mga residente basi matapos an impluwensiya han insurgensya ha ira bungto.
Usa han mga natudluk nira nga nakabulig agud mabag-o an kamutangan han Matuguinao an kasumpay han bungto ngadto ha national highway tinikangan han 2019 pinaagi han road construction project han PAMANA.
Nakabulig gihapun agud tumapod utro ha gobyerno an mga mulopyo han Matuguinao subay ha ira Mayor an waray pinili nga paghatag hin serbisyo han lokal nga pamunuan ngadto ha katawhan.
Samtang, ginpasalamatan naman ni 8th Infantry Division Commander Major General Peter Burgunio an suporta ngan kooperasyon han mga residente han Matuguinao nga dako an kontribusyun basi mahikab-utan an gin uungara nga kamurayawan ha bungto.
Gin patapud gihapun niya an padayun nga pagsuporta ha seguridad ha LGU agud magpadayun nga mamingaw ngan mamurayaw an bungto.
Ha bahin naman han kapulisan, gin patapud ni Samar Police Provincial Director PCol Arwin Radeon nira an mahugot nga pagsuporta ha LGU agud magpadayun an kamurayawan ngan naproteheran an komunidad agud diri makawang an mga gin buhat nga pitad ha pag abut han tinguha hin pagdukwag ngan magin progresibo an bungto.
Source: RMN Tacloban