Patay ang isa ka bedridden individual bangod sang mabaskog nga baha nga nag-igo sa pila ka mga Local Government Unit (LGU) sa Negros Occidental bangod sang shear line.
Suno sa Provincial Disaster Risk Reduction and Management Council (PDRRMC), ang napatay amo si Angelina Oro, 87 anyos, bedridden, matapos nagsulod ang tubig baha ang iya balay sa Purok River Hillside, Barangay Fabrica, Syudad sang Sagay.
Kabug-usan nga 1,091 ka pamilya ukon 4,034 ka indibidwal halin sa 14 ka barangay ang naapektuhan sang baha kag landslide sa lima ka LGU sa probinsya.
Apektado ang mga barangay Fabrica, Poblacion 2, Paraiso kag Bato sa Sagay City; Camalpisawan kag Suba sa Calatrava; Bug-ang, Magticol, San Jose, Tabun-ac, Bandila kag San Isidro sa Toboso; Barangay San Jose sa EB Magalona; kag Barangay Tiglawigan sa Cadiz City.
Suno kay Toboso Mayor Richard Jaojoco, may nagluntad nga landslide sa Sitio Magtu-od kag Sitio Polopangyan I sa Barangay Bug-ang.
May mga na-damage man nga mga imprastruktura lakip na ang apat ka footbridge sa bahin sang Barangay San Isidro, Toboso, bangod amo nga ulan kag baha subong man ang mga sapat nga naglakamatay.
Source: BrigadaNewsFmBacolod