Natagpuang wala ng buhay ang isang 45-anyos na magsasaka sa loob ng kanyang kubo sa Sitio Barucan, Barangay Lugo, Borbon, Cebu nitong Biyernes ng hapon, Agosto 19, 2022.
Kinilala ang biktima na si Cruz Moneva, 45, residente ng nabanggit na barangay.
Ayon kay Police Staff Sergeant Raffe Tejares, Investigation Officer ng Borbon Police Station, ang bankay ng biktima ay natuklasan dakong alas-tres ng hapon ng isang kapitbahay nito na si Alberto Dichos Sr. na noo’y papunta sa bahay ng biktima para ipaalam na nakawala ang kanyang baka. Ngunit pagdating sa bahay ng biktima ay nakita na lamang ito na nakahandusay sa kanilang sahig na agad naman nitong ipinaalam sa mga awtoridad.
Batay sa inisyal na imbestigasyon, wala naman umanong kaaway si Moneva. Bagama’t ibinukod ng pulisya na may foul play sa naturang insidente, pinayuhan ang pamilya nito na ipa-autopsy ang kanyang bangkay upang matukoy ang sanhi ng kamatayan, ngunit saad umano ng pamilya na wala silang kakayahan upang bayaran ang pagsusuri.
Ganun pa man, patuloy naman na tinitingnan ng mga awtoridad ang iba pang maaring sanhi ng pagkamatay ng biktima.