Gintutuyo han City Government han Maasin nga mas mapahimulosan an nakolekta nga basura pinaagi ha pagbalhin han ginlabay nga mga garbahi ngadto ha mga materyales nga mahimo pa magamit sugad nga resources, usa nga sistema nga kilala yana sugad nga circular economy. An Circular Economy Workplan han syudad, nga ginngaranan Maasin City Ajonay Circular Economy (MaAjo-CE) Program, opisyal nga gin-aprobaran ni City Mayor Luz Mercado, sumala ha post han City Government han Maasin ha ira social media page. An workplan ginpresentar durante han miting han Local Circular Economy Action Team (LCEAT) dida han Marso 5, 2026, kun diin nagtirirok an mga stakeholders tikang ha nagkalain-lain nga sektor agud paghisgutan ngan pinal nga tapuson an mga estratehiya.
Gin-aaddress han plano an plastic waste, yard waste sugad han lubi ngan cacao, ngan an basura tikang ha merkado ngan kusina. Nakalakip liwat hini an mga estratehiya para ha circular economy capacity building, mga polisiya ngan regulasyon, pagpondo para han CE, teknolohiya ngan mga inobasyon, ngan pagbag-o han pamatasan han komunidad. Ginsuportahan an proyekto pinaagi han European Union–Philippines (EU-PH) Green Economy Partnership, nga may 60 nga syudad ha bug-os nga nasud nga benepisyaryo. Sumala kan Leah Payud, LGU ngan stakeholder specialist han United Nations Development Programme (UNDP) ngan focal person ha syudad, ha Region 8 an mga syudad la han Ormoc ngan Maasin an ginpili nga benepisyaryo han UNDP-backed nga proyekto. (MMP, may datos tikang ha City Government han Maasin)
Source: PIA Southern Leyte