Ginkilala na sang pamilya ang bangkay sang lalaki nga nasapwan alas 12:00 sang kaagahon, Hunyo 24 sa Bacolod-Silay Airport Access Road, nasakpan sang Hda. Mana-ul, Barangay Matab-ang, syudad sang Talisay, Negros Occidental.
Ang biktima ang ginkilala sa kay Hermar Samorillo, 31 anyos kag residente sang Purok Datiles, Barangay Handumanan syudad sang Bacolod.
Suno sa kay Police Cpl. Aljon Bautista, investigator sang Talisay City Police Station, nakig-angut na ang pamiya sa ila kag nahibaluan nga ang biktima ang nagatrabaho bilang construction worker.
Dugang pa ni Bautista, ulihi nga nasugilanon sang pamilya ang biktima tatlo na ka adlaw ang nakaligad bangud malaka man ini nagapauli sa ila lugar.
Ginahibalo sa karon sang kapulisan ang background ni Samorillo agud mahibaluan kun may yara ini sang kontra kag kun sin-o ang ulihi sini mga nakaupod pati na kun sa diin ini siya ulihi nga nakita nga buhi.
Duwa ka basiyo kag slug sang cal.40 ang narekober sa crimescene.
Duwa man ka igo sa natuo nga liog ang nakita sa bangkay sang biktima kag naglapos sa nawala nga liog.
Padayon ang imbestigasyon sang kapulisan sa insidente.