Isang lalake na inakusahan ng panggagahasa sa kanyang kasintahan ang inaresto ng pulisya sa kanyang tirahan sa Barangay Jolomaynon, Dalaguete, Southern Cebu nito lamang Biyernes ng madaling araw, Hulyo 22, 2022.
Kinilala ni Staff Sergeant Lowelyn Lim, ng Women’s and Children Protection Desk ng Dalaguete Police Station, ang 24-anyos na suspek na si Victor (hindi tunay na pangalan).
Inaresto ang suspek batay sa warrant of arrest na inisyu ni Judge Francis Rainier Navarrette ng Argao Regional Trial Court branch 93.
Ayon kay Lim, nangyari ang insidente ng panggagahasa noong Pebrero 13, 2022 at isinampa ang kaso laban kay Victor noong Marso 27, 2022.
Lumalabas sa imbestigasyon na pinilit umano ni Victor ang kanyang kasintahang si Annie (hindi tunay na pangalan) na makipagtalik sa kanya sa bahay nito sa gitna ng kanilang pagtatalo matapos itong mahuli ng biktima na nakikipagrelasyon sa ibang babae. Pisikal ding sinaktan ng suspek si Annie.
Walang inirekomendang piyansa sa suspek para sa kasong panggagahasa, maliban sa kasong physical abuse nito na may piyansang Php3,000.