Sa padayong kampanya batok sa ilegal nga drugas, malampusong gipahigayon sa Talibon Municipal Police Station ang usa ka buy-bust operation niadtong gabii sa Marso 26, 2026, didto sa Purok 4, Barangay San Isidro. Ubos sa pagdumala ni PMAJ ROMMAR T LABASBAS, ang operasyon miresulta sa pagkasikop sa usa ka 43-anyos nga lalaki nga giilang si alias “Ertz,” usa ka residente sa Poblacion, Talibon.
Atol sa maong operasyon, nakuha gikan sa suspetsado ang motimbang og 7.91 gramos sa gituohang shabu, nga adunay gibanabana nga kantidad nga ₱53,788.00. Ang maong indibidwal anaa karun sa kustodiya sa Talibon Municipal Police Station samtang mag-atubang siya ug kasong paglapas sa Republic Act 9165 o Comprehensive Dangerous Drugs Act of 2002.
Ang maong kalampusan giisip nga usa ka dako nga hampak batok sa pagpamaligya og ilegal nga drugas sa dapit, nga nagpakita sa kakugi sa mga otoridad sa pagmintinar sa kahapsay ug kalinaw.
Gidayeg ni PCOL PATRICIO C DEGAY JR., ang Provincial Director sa Bohol, ang dedikasyon sa Talibon PNP. Iyang gipasabot nga ang maong gidaghanon sa droga dako og mahatag nga kadaot sa komunidad kon wala kini mapugngi. Sumala pa kaniya, ang lig-on nga kooperasyon tali sa kapulisan ug sa katawhan maoy yawe aron makab-ot ang tinguha sa PNP Bohol alang sa usa ka luwas ug “drug-free” nga probinsya.
Kini nga operasyon nagsilbi nga lig-on nga mensahe nga ang kapulisan sa Bohol dili mohunong sa pagpangita sa mga indibidwal nga naglambigit sa ilegal nga kalihokan. Pinaagi sa pagtinabangay sa gobyerno ug sa komunidad, padayon ang paningkamot alang sa usa ka mas hayag ug luwas nga ugma para sa tanang Bol-anon.
“Bagong PNP para sa Bagong Pilipinas: Serbisyong Mabilis, Tapat, at Nararamdaman”
𝐏𝐀𝐇𝐈𝐁𝐀𝐋𝐎: Ang tinuod nga mga ngalan, pagkatawo, ug hulagway sa mga suspetsado, biktima, ug mga saksi gitago subay sa Data Privacy Act, PNP Freedom of Information Manual, PNP Media Relations Policy, ug sa Konstitusyon sa Pilipinas.
Source: PNP Bohol