Naka-save sang masobra P6.3 million ang Iloilo Provincial Government sa sulod sang isa ka tuig paagi sa paggamit sang solar panel energy sa Iloilo Provincial Capitol kag sa mga district hospital sa probinsya.
Sa isa ka interview, ginpahayag ni Atty. Cesar Emanuelle Buyco, head sang Provincial Environment and Natural Resources Office (PENRO), nga nag-invest ang probinsya sang humalin P25 million para sa pag-install sang solar panels.
Suno sa iya, kabahin ini sang inisyatibo sang probinsya agud mangin mas mangin innovative kag epektibo sa paggamit sang enerhiya.
Imbes nga dako nga kantidad ang mabaydan sa mga power provider, nakakinot ang probinsya sang P6.3 million nga mahimo pa magamit sa nagkalain-lain nga proyekto sang gobyerno.
Pahayag pa ni Buyco, dako gid ang bulig sang solar energy ilabi na sa mga ospital, bangud kadako sang nabuhin nga balayran sa kuryente sang tagsa ka district hospital sa probinsya sang Iloilo.
Suno pa kay Buyco, ang solar panel system ang ginapaabot nga magalawig sang 15 ka tuig, nga magapadayon nga magahatag benepisyo sa Iloilo Provincial Capitol kag sa mga ospital.
Gindugang pa niya nga ang mga nakinot nga pondo mahimo liwat i-reinvest sa pagbakal kag pag-install pa sang dugang nga solar panels.
Sa karon, ginaplano man sang Iloilo Provincial Government nga ipatuman ang pareho nga proyekto sa mga buluthuan, bilang kabahin sang amat-amat nga transition sa renewable energy sa probinsya.
Ini isa ka tikang nga ginakabig nga makahagan-hagan kag makabulig indi lamang sa gobyerno kundi pati na sa palibot.
Source: Bombo Radyo Iloilo