Gina-antisipar sang Iloilo City Police Office (ICPO) nga possible nga magataas ang kaso sang kinawatay kag iban pa nga petty crimes subong nga yara sa tion sang krisis ang bilog nga pungsod.
Suno kay PCol. Wilbert Parilla, Officer-in-charge sang ICPO, subong nga nagataas ang presyo sang gatong kag mga balaklon, mas nangin mabudlay ang sitwasyon sa publiko kag possible nga tunaan pa sang mga krimen.
Ginsiling ni Parilla nga agud malikawan ang pagtaas sang record sang krimen, magapatuman sang adjustment sa deployment ang mga kapulisan kag mas pasangkarun ang police visibility sa pila ka mga lugar sa siudad.
Dugang pa niya, kinahanglan nga mag-aligmat gid subong nga nagapadulong naman ang summer vacation kun sa diin kalabanan sa mga magpamilya ang nagalagaw sa mga nanari-sari nga lugar nga isa man ka dako nga oportunidad sa mga indibidwal nga may tuyo nga magpangawat.
Source: Bombo Radyo Iloilo