Natagpuang nakahandusay at wala nang buhay ang isang guro sa loob ng isang housing unit sa Nightreach Village, Brgy. Camansihay, Lungsod ng Tacloban bandang 3:43 ng hapon nitong Sabado, Nobyembre 25, 2023.
Kalunos-lunos ang sinapit ng guro na kinilala ng mga awtoridad na si Teacher Bernabe “Bhing” Acosta Basiano, 38 anyos, kasalukuyang high school teacher sa Antonio Balmes National High School at residente ng St. Francis Village ha Brgy. Suhi, Tacloban City.
Ayon sa mga awtoridad, lumalabas na nagtamo ng samu’t saring saksak sa leeg ang biktima na naging sanhi ng kanyang pagkasawi.
Batay sa inisyal na pagsisiyasat ay hindi rin umano sa naturang lugar pinatay ang biktima kundi dito lamang itinago ang naturang biktima.
Sa ngayon ay natukoy na umano ng Tacloban City Police ang mga suspek na responsable sa pagpatay sa guro ngunit tumanggi muna nitong ilantad sa publiko ang pagkakakilanlan ng mga suspek.
Samantala, naglabas naman ng opisyal na pahayag ang Department of Education (DepEd) Eastern Visayas kung saan mariin nitong kinundena ang brutal na pagpatay sa nasabing guro. Nanawagan naman ito ng mabilis na pagresolba sa kaso at pagbigay ng karampatang hustisya sa mga naulilang mga kapamilya.