Bilang tugon sa mga ulat mula sa mga nag-aalalang residente, agad na naglunsad ng military operation ang mga tauhan ng 12th Infantry “Lick Em” Battalion ng 3rd Infantry Division ng Army laban sa Communist Terrorists Group (CTG) na namataan sa liblib ng lugar ng Tapaz, Capiz.
Nakasagupa ng tropa ang tinatayang higit-kumulang 10 na armadong miyembro ng Communist NPA Terrorists (CNTs) sa Weakened Central Front (CF) ng Komiteng Rehiyon-Panay (KR-Panay) sa Barangay San Antonio, Tapaz, Capiz noong ika-15 ng Marso 2024.
Ayon sa ulat, ang mga armadong miyembro ng Communist Terrorist Group ay nagsasagawa ng pangongotong at pangingikil sa mga residente sa lugar at sa mga kalapit na baryo.
Narekober mula sa encounter site ang isang 5.56mm M16 Assault rifle, isang long magazine ng M16 Assault Rifle, sampung piraso ng 5.56mm bala, at ilang personal na gamit.
Samantala, wala namang naitalang nasawi sa panig ng gobyerno at sa panig ng CTG sa labanan na tumagal ng limang minuto, pagkatapos ay umatras ang mga CNTs patungo sa iba’t ibang direksyon.
Samantala, pinasalamatan ng pamunuan ng 12IB ang lokal na mamamayan sa kanilang pakikipagtulungan, na nagresulta sa matagumpay na engkwentro at pagkakabawi ng isang high powered firearm na isang indikasyon ng magpapahina pa sa kakayahan ng KR-Panay sa panggugulo at pananamantala sa mga residente ng Tapaz at pigilan ang paghahatid at pagpapatupad ng mga serbisyo ng pamahalaan at mga proyektong pangkaunlaran sa liblib na mga lugar ng Tapaz.
Pinuri din ni 3ID Commander Major General Marion R. Sison ang 12IB at ang mga mamamayan ng Tapaz, Capiz sa kanilang pagiging responsible at mapanuri na nagresulta sa isang mahalagang tagumpay na magdadala sa tuluyang pagkabuwag ng local terrorist at maitatag ang pangmatagalang kapayapaan at seguridad sa Panay Island.
Source: Philippine Army Spearhead Troopers Panulat ni Pat Charmaine Balunsat