Waray magmalinampuson an natabo nga robbery-hold-up ha Grand Tours terminal ha Catbalogan City, kakulop Sabado han gab-i, Marso 28, han magresulta hin purupsilay nga nagbilin hin usa nga suspek patay, usa dakop, ngan usa pa an ginbibiling yana han mga otoridad.
Dead-on-arrival ha hospital an usa ha tulo nga mga suspek nga ginkilala la ha alyas “Jer,” residente han Jiabong, Samar. Nakadakop naman hi alyas “Rob,” samtang padayon an manhunt operation kontra kan alyas “Ado,” nga taga Anda, Pangasinan.
Sumala ha inisyal nga imbestigasyon, alas 7:36 han gab-i han natabo an insidente han tulo nga armado nga kalalakin-an in tigda la nagdeklara hin hold-up ha sulod han cashier’s room han terminal. Ginpirit nira an cashier nga ighatag an mga kwarta ngan cellphone antes nira ginpaningkamotan nga makakalagiw.
An panhitabo in namonitor han tag-iya, sanglit nag-armas ini ngan gin-lanat an mga suspek—nga nagresulta hin purupsilay.
Dida han komosyon, duha ha mga suspek an nasamaran ngan gindara ha Samar Provincial Hospital, pero gindeklara nga patay an usa.
An ikatulo nga suspek naman in nakakalagiw.
Narekober ha lugar an ginpanikas nga kwarta, mga armas, ngan iba pa nga gamit han mga suspek.
Padayon yana an imbestigasyon han mga otoridad samtang ginpapakusog an operasyon agud madakop an nakalagiw nga suspek.
Source: RMN Tacloban