Giawhag ang mga motorista nga magpraktis og mga pamaagi sa pagtipid sa gasolina samtang padayon ang pagsaka sa presyo niini tungod sa mga panghitabo sa kalibutan, lakip na ang krisis ug gubat sa Middle East.
Gitambagan sa mga awtoridad ang mga drayber nga likayan ang dugay nga pagpaandar sa makina kung naghulat pinaagi sa pagpalong niini. Girekomenda usab ang pagpadagan sa sakyanan sa hapsay ug parehas nga tulin ug paglikay sa kalit nga pagpreno o kusog nga pagpadagan sa sakyanan aron makatipid sa gasolina.
Importante usab ang regular nga pagmentinar sa sakyanan sama sa pag-ilis sa motor oil ug paglimpyo sa air filter aron mas episyente ang konsumo sa gasolina.
Alang sa dugang nga pagtipid, gidasig usab ang mga motorista nga mag-carpool o mogamit sa pampublikong transportasyon kung mahimo.
Bisan pa sa kalisod, nagpabilin nga determinado ang ubang drayber sa pagtrabaho aron masuportahan ang ilang pamilya. “Basta maningkamot lang ta, dili ta mahutdan,” matod pa sa drayber nga si Rolandyo Layos.
Gipasiugda sa mga opisyal nga ang responsableng pagdrayb ug hustong pag-atiman sa sakyanan makatabang sa mga motorista sa pagdumala sa ilang gastohan samtang taas ang presyo sa gasolina.
Source: SunStar Publishing Inc