Namahagi ang Department of Social Welfare and Development (DSWD) ng nasa 45,333 family food packs (FFPs) sa mga pamilyang naapektuhan ng Bagyong “Enteng” sa tatlong probinsya sa Samar nitong Lunes, ika-9 ng Setyembre 2024.
Ayon sa opisyal ng DSWD sa rehiyon, ang mga naibigay na food packs ay panimula pa lamang dahil ang pagbaha sa Northern Samar, Eastern Samar, Samar, at Biliran ay nagpalikas ng 55,940 pamilya na nakatira sa 322 barangay.
“Patuloy ang pakikipag-ugnayan at pagmamanman ng quick response team ng DSWD upang agad na makapagbigay ng tulong kung kinakailangan,” sabi ni Jonalyndie Chua, Regional Information Officer ng DSWD Eastern Visayas, sa isang panayam.
Sa kabuuang bilang ng FFPs na naipamahagi, 33,799 ang natanggap ng mga pamilya sa Northern Samar, 8,015 sa Samar, at 3,519 sa Eastern Samar. Nasa Php28.65 milyon ang kabuuang halaga, kasama ang 468 non-food items.
Ang isang kahon ng FFP ay sapat upang pakainin ang isang pamilya na may dalawang hanggang tatlong miyembro sa loob ng dalawang hanggang tatlong araw.
Bawat pack, na nagkakahalaga ng Php500, ay naglalaman ng anim na kilo ng bigas, apat na lata ng corned beef, dalawang lata ng tuna flakes, dalawang lata ng sardinas, limang sachet ng kape, at limang sachet ng energy drink.
Hanggang noong Setyembre 8, may Php120.12 milyon na halaga ng relief items ang nakalaan para sa mga biktima ng bagyo sa Eastern Visayas.
Panulat ni Cami
Source: PNA