Ang Department of Social Welfare and Development Field Office VII (DSWD-7), pinaagi sa Sustainable Livelihood Program (SLP), malampusong nagpahigayon og serye sa pagpanagtag sa ayuda panginabuhi sa mga Local Government Units sa Carcar City ug Santander, probinsya sa Sugbo.
Kapin sa 223 ka mga partisipante gikan sa duha ka LGU ang nakadawat og tag-₱15,000 nga livelihood assistance aron magsugod o mapalambo pa ang ilang gagmay’ng negosyo. Ang maong ayuda gituyo aron makahatag og kapital sa pagsugod ug makapalig-on sa ilang mga panginabuhian alang sa mas lig-on nga kita sa matag panimalay.
Human sa pagdawat sa ayuda, gi-require ang mga benepisyaryo nga motambong sa capability-building activities. Kini nga mga kalihokan nagtumong sa pagpalambo sa ilang kahibalo sa pagdumala sa kapital, pagplano sa negosyo, ug pagsiguro sa pagpadayon ug pagtubo sa ilang mga enterprise.
Atol sa distribusyon, gitukod usab ang BBM Serbisyo online platform sa lugar aron motabang sa pag-verify sa PhilSys IDs sa mga partisipante, nga nakatabang sa mas paspas, episyente, ug tukmang proseso sa pag-ila sa mga benepisyaryo.
Gipadayag sa DSWD-7 ang ilang padayong paningkamot sa paghatag og malungtarong oportunidad sa panginabuhi ug mas lig-on nga serbisyo alang sa komunidad.
Source: DSWD Field Region-7