Nagbuhat hin lain nga inspeksyon hi Department of Public Works and Highways (DPWH) Secretary Vince Dizon han pipira nga bahin han Maharlika Highway ha Samar han Lunes, Marso 9, sugad nga bahin han padayon nga paningkamot han gobyerno nga mapaopay an kahimtangan han panguna nga road network han nasud.
Durante han pagbisita, personal nga gin-inspeksyon ni Dizon an mga importante nga seksyon han Maharlika Highway ngan gin-assess an kahimtangan han dalan samtang ginrepaso an progreso han padayon nga maintenance ngan rehabilitation works.
An Maharlika Highway, nga kilala liwat sugad nga Pan-Philippine Highway, amo an pinakahilaba nga road network ha Pilipinas nga nagdudugtong han Luzon, Visayas, ngan Mindanao, ngan nagseserbi nga importante nga ruta para han transportasyon, kalakalan, ngan pagbiyahe han mga tawo.
Nalipay an mga residente han lugar han ira makita an presensya ni Dizon, nga nagsiring nga an sugad nga inspeksyon nakakahatag kasiguruhan nga an mga proyekto ha dalan ginpapatuman hin maayos ngan epektibo.
Ginpamatuod ni Dizon ha mga residente nga an mga seksyon han dalan nga gin-aayos yana, labi na ha mga bungto han Pinabacdao ngan Sta. Rita ha Samar, target nga matapos antes han Semana Santa basi masiguro an mas hapsay ngan mas ligtas nga pagbiyahe han mga motorista ngan mga pasahero.
Source: PIA Eastern Visayas