Dumaguete City, Negros Oriental – Naglaan ang Department of Labor and Employment (DOLE) ng humigit-kumulang Php4.1 milyon na karagdagang tulong pangkabuhayan para sa mga vulnerable na sektor sa Negros Oriental.
Sinabi ni Rubie Cempron, Labor and Employment Officer III at Livelihood Focal Person ng DOLE-Negros Oriental Field Office, sa Philippine News Agency noong Lunes na bahagi ito ng Livelihood Integrated Program ng ahensya upang matulungan ang mga vulnerable na sektor sa kanilang pang araw-araw na pangangailangan.
Noong simula ng buwan, ibinahagi ni Cempron na higit sa Php409,000 ang inilabas ng ahensya para sa 14 na dating rebelde (FRs) upang matulungan sa kanilang mga proyektong pangkabuhayan, gaya ng pag-aalaga ng manok, pangingisda, pag-aalaga ng kalabaw at produksyon, at iba pa.
“One requirement for the FRs to qualify for DOLE assistance is that they have already been enrolled in the Enhanced Comprehensive Local Integration Program or E-CLIP,” aniya.
Nagbigay rin ng tulong sa dalawang persons with disabilities (PWDs) para sa serbisyong masahe at self-operated car wash, habang ang isang person deprived of liberty ay tumanggap ng tulong para sa pagsisimula ng sari-sari store na nagkakahalaga ng higit sa Php50,000.
Plano rin ng DOLE na maglaan ng higit sa Php200,000 na tulong pangkabuhayan para sa pitong persons deprived of liberty (PDLS) para sa paggawa ng “kakanin” (rice cake) pag-iimprenta ng canvass, at pagbebenta ng bigas at mga produkto ng agrikultura.
Ayon kay Cempron, maglalaan din ang DOLE ng higit sa Php3.4 milyon para sa iba’t ibang proyektong pangkabuhayan na ibibigay sa 118 mga magulang ng mga batang manggagawa sa lalawigan.
Noong unang bahagi ng 2024, naglaan na rin ang DOLE sa Negros Oriental ng higit Php5.1 milyon para sa 326 mga benepisyaryo, limang associations, at 19 indibidwal para sa iba’t ibang proyektong pangkabuhayan mula Enero hanggang Hunyo.
Sa pamamagitan ng mga programa tulad ng tulong pangkabuhayan ng DOLE, layunin ng gobyerno na bigyan ng sapat na tulong at pagkakataon ang mga mahihirap at vulnerable na sektor. Ito ay bahagi ng malawakang misyon na makamtan ang ganap na pag-unlad na makakarating sa lahat, lalo na sa mga pinaka-nangangailangan tungo sa mas maunlad na Bagong Pilipinas.
Source: PNA