Malampuson nga ginpatigayon sang Department of Agriculture-Bureau of Fisheries and Aquatic Resources Regional Office VI (DA-BFAR 6) ang duha ka adlaw nga writeshop sa Scientific Writing kag Publications sang Pebrero 19–20, 2026.
Nagpartisipar sa aktibidad ang 36 ka personnel sang DA-BFAR 6 halin sa nagkalain-lain nga operating units sa rehiyon, nga may tuyo nga mapa-ayo ang ila technical writing kag research skills. Ang writeshop naghatag sang kahibalo kag kagamitan nga kinahanglan para makapreparar sang scientific reports nga angay sa national kag international standards.
Ginhatagan sang expert lectures si Dr. Frank Paolo Jay Albarico, Assistant Professor sa National Kaohsiung University of Science and Technology, Taiwan, parte sa fundamentals kag proseso sang scientific writing, pag-istruktura sang research papers, pag-organisar sang data, kag pag-navigate sa publication process. Bilang bahin sang workshop outputs, ang mga participants nagtrabaho sa pag-transformar sang ila existing technical reports ngadto sa publishable scientific papers.
Ang writeshop kabahin sang padayon nga professional development initiatives sang DA-BFAR 6, nga nagapakita sang komitment sang ahensya sa pagpabakod sang research capabilities kag pagpromote sang knowledge sharing sa sulod sang organisasyon kag sa mas lapad nga komunidad.
Source: BFAR Region 6