Pinuri ng Commission on Elections (Comelec) ang iba’t ibang ahensya sa Silangang Visayas dahil sa pangkalahatang mapayapang midterm elections, kahit sa mga bayan na tinaguriang mga hotspot.
“Medyo ikinagulat namin na kahit sa mga lugar na nasa ilalim ng red category, tulad ng Sta. Margarita, Samar, ay nanatiling mapayapa. Bunga ito ng ilang buwang paghahanda at mga pagpupulong ukol sa seguridad,” ayon kay Comelec Eastern Visayas Assistant Regional Director Maria Corazon Montallana sa panayam ng mga mamamahayag nitong Martes Mayo 13, 2025.
Ang bayan ng Sta. Margarita ang tanging lugar sa rehiyon na nasa red category dahil sa mga naitalang insidente kaugnay ng halalan at presensya ng mga rebelde at armadong grupo.
Mayroon pang 26 na iba pang bayan na kinilalang election areas of concern na isinailalim sa orange at yellow categories.
“Patuloy ang aming pagsusumikap na turuan ang mga tao upang makamit ang mapayapang halalan. Sama-sama ang lahat sa pagtutulungan ngayon, hindi tulad noong dati na Comelec, pulis, militar, at Department of Education lang ang kasali,” dagdag ng opisyal ng Comelec.
Idineklara naman ng Police Regional Office 8 na ang halalan noong Mayo 12 ay pangkalahatang mapayapa, sa kabila ng ilang insidenteng agad namang naresolba ng mga awtoridad, matapos magpakalat ng mahigit 10,000 pulis mula sa PRO-8, katuwang ang Philippine Army at Philippine Coast Guard, sa iba’t ibang panig ng rehiyon.
Bilang bahagi ng seguridad sa halalan, nagtayo ng 79 Comelec checkpoints sa mga estratehikong lugar sa mga lalawigan ng Northern Samar, Eastern Samar, Samar, Leyte, Southern Leyte, at Biliran.
Hindi bababa sa 71 katao ang naaresto dahil sa paglabag sa liquor ban, habang 64 naman ang nahuli dahil sa paglabag sa gun ban mula nang ito ay ipatupad. May isang tao ring naaresto sa Calbayog City dahil sa umano’y pamimili ng boto.
Samantala, sinabi ni Montallana na lahat ng resulta ng halalan ay naipadala na maliban sa isa o dalawang presinto sa mga sumusunod na bayan: Burauen, Palompon, Abuyog, at Baybay City sa Leyte; at Silvino Lobos, Pambujan, Las Navas, Mondragon, at Catarman sa Northern Samar.
“May problema sa internet service provider kaya may kaunting pagkaantala, ngunit inaasahan naming maipapadala ang resulta mula sa mga lugar na ito ngayong araw,” dagdag niya.
Kumpiyansa ang Comelec na humigit-kumulang 80 porsyento ng 3,259,554 rehistradong botante sa rehiyon ang nakaboto noong halalan nitong Mayo 12.
Source: PNA