Ginpasanyog ni Mayor Greg Gasataya nga nagdeploy ang Bacolod City sang Joint Fuel Monitoring and Inspection Team agud masiguro nga ginapatuman sang mga gasolinahan ang ginpahanugutan nga fuel price adjustments sang Department of Energy (DOE), bangod sa nagasaka nga presyo sang krudo nga ginadugtong sa sitwasyon sa Middle East.
Ang monitoring team ginabug-usan sang mga representante halin sa City Mayor’s Office, City Legal Office, City Treasurer’s Office, Business Permits and Licensing Office, Communications Office, kag Bacolod City Police Office (PNP).
Suno kay Gasataya, ang team magahimo sang inspeksyon sa mga gasolinahan, magadokumento sang kahimtangan sang suplay sang krudo, kag magaimbestigar sang mga reklamo ukon posibleng iregularidad, sa koordinasyon sa Department of Energy.
“Indi naton pagpasugtan ang overpricing kag ang bisan sin-o nga magtake advantage sang nagasaka nga presyo sang fuel,” siling sang alkalde.
Sang Marso 11, 2026, nagpatawag sang alignment meeting si Gasataya kaupod si City Administrator Mark Mayo, Secretary to the Mayor Marty Go, kag mga representante halin sa City Legal, City Treasurer’s Office, kag Business Permits and Licensing Office sa Bacolod City Government Center.
Sa meeting, ginpahamtang ang mga pamaagi sa pagdokumento sang monitoring. Lakip diri ang pagrekord sang ngalan kag lokasyon sang gasolinahan, petsa kag oras sang inspeksyon, report ukon litrato sang fuel supply, obserbasyon sang indi normal nga pagpamakal sang fuel, kag pagkuha sang pahayag ukon klaripikasyon halin sa management sang gasolinahan.
Suno pa kay Gasataya, importante gid ang insakto nga dokumentasyon agud masiguro ang patas nga pagmonitor sa tanan nga establisemento.
“Sa tion nga madamo sa aton mga pumuluyo ang nagaantos sa ekonomiya, nagapanindugan kita nga protektahan ang mga Bacolodnon batok sa mga nagaabuso sang sitwasyon,” siling niya.
Base sa rekord sang siyudad, may 164 ka gasolinahan nga rehistrado sa Bacolod, kag 151 sini ang kasubong nga naga-operate sa subong.
Ginpahayag man sang alkalde nga ang ini nga inisyatibo kabahin sang tikang sang lokal nga panguluhan agud masabat ang nagasaka nga presyo sang fuel kag masiguro nga ginapatuman sang mga gasolinahan ang mga guidelines sang DOE sa patas nga presyo.
Ginpasiguro man ni Gasataya nga ang monitoring team, kaupod ang PNP kag lokal nga panguluhan, magabantay kag magaresponde sa mga reklamo ukon posibleng paglapas sang mga gasolinahan base sa ginpahanugutan nga fuel price adjustment sang DOE.