Nakuha sang mga awtoridad ang isa ka armas nga may defaced serial number kag iban pa nga mga kagamitan kasunod sang engkwentro nga nagluntad sa Sitio Pinyahon kag Sitio Proper, Barangay Minautok, Calatrava, Negros Occidental.
Sini lang nagligad Lunes, April 6, 2026, natabo ang engkwentro sa tunga san 79IB sang militar kag sa pito ka mga miyembro sang Communist Terrorist Group (CTG). Nagluntad ang engkwentro sang halos 15 minutos.
Ang mga rebelde amo ang mga katapo sang Northern Negros Front (NNF-D), Komiteng Rehiyon–Negros (KR-N), sa idalom sang liderqto ni Roger Fabillar y Tapang alyas “Jhong.”
Ang grupo amo ang ginatumod nga responsable sang pagpamatay sang mga inosente nga sibilyan sa mga lugar sang Escalante City, Toboso, kag Calatrava. Sa nagligad nga tulo ka tuig, may yara na nga Php1 Milyon cash reward nga ginpaguwa ang gobyerno para sa makahatag sang impormasyon para maaresto si Fabillar.
Narekober man sang mga militar ang anom ka long M16 magazines; NPA flag; bandolier; isa ka sako nga bugaa; cooking paraphernalia; kag iban pa nga mga personal belongings.
Magapadayon man ang pareho nga mga operasyon suno sang militar hasta maubos ang tanan nga mga rebeldeng grupo sa bilog Negros Island Region.
Source: 79 IB, 3rd ID, Philippine Army