Napamatud-an sang isa anay ka myembro sang rebelde nga grupo nga wala sang kamatuoran ang pangako sang rebelde nga New People’s Army nga mangin masulhay ang kabuhi kun magsulod sa ila nga grupo.
Suno kay Jenamie Tacanloy, iya ginpakigbahin ang iya mga personal nga na-eksperyensyahan kun paano siya na-recruit kag nangin parte sang rebelde nga grupo.
Suno sa iya, nagsugod ini bangud sang problema nga pinansyal, kag gin-brainwash ini sang iya nobyo nga magabag-o ukon mangin manami ang kabuhi sini kun magsulod ini sa grupo.
Ginhambalan siya nga bisan mag-eskwela ukon makatapos pa ini sa iya nga pagtuon, wala man sang may matabo nga pagbag-o sa iya kabuhi bangud indi man manami ang pagpang-gobyerno sa pungsod kag didto na ini nagsaka sa bukid upod sa mga rebelde.
Nagpabilin si Tacanloy sa grupo sa sulod sang isa ka tuig kag tunga.
Suno sa iya, sa una manami pa ang pagtratar sa ila, apang sang nagdugay, nangin mabudlay na ang ila sitwasyon kag masami sila nga gutom.
Nadesisyuan na lang sini nga magbiya kag magpalagyo sa rebelde nga grupo sang nagbusong na ini sang isa ka bulan.
Pagkatapos sang ila pagpalagyo, nagkadto sila anay sa Manila sang iya partner kag nagtinir didto sang anum ka bulan.
Pagkatapos sadto, nakig-angot sila sa ila LGU agud malimpyuhan ang ila pangalan agud makapangabuhi na sila sang matalunsay.
Source: Bombo Radyo Iloilo