Aada na ha state of decomposition han mahikit-an an patay nga lawas han usa nga lalaki ha Sitio Palanas, Purok 5, Brgy. Muńoz, Catbalogan City, Samar, kakulop, April 10, 2026, banda alas 4:30 han kulop.
Ginkilala an biktima nga hi alyas “Frank,” 64-anyos, waray trabaho, single, ngan residente han Catbalogan City.
Mahuman makakarawat hin impormasyon an mga operatiba han Catbalogan City Police Station tikang ha usa nga concerned citizen hiunong ha nadiskobre nga patay nga lawas ha lugar, dayon ini nira nga ginkadto kun diin tumapo ha ira an lawas han biktima nga ada na ha state of decomposition.
Sumala ha mga amyaw han biktima, kilala ini nga mahilig uminom hin makahurubog nga irimnom kada adlaw.
Nakigkoordinar naman an buhatan ha SOCO team para han pagproseso han patay nga lawas kun diin waray sinyales hin external injuries o signs of struggle an naobserbar, ngan waray natudlok nga ebidensya nga nagpapakita hin foul play ha panhitabo.
Source: RMN Tacloban