Ginrelease na sang Department of Social Welfare and Development (DSWD) ang yara sa PHP831.626 Million sa idalom sang Emergency Cash Transfer (ECT) assistance sa mga benepisyaryo nga apektado sang hagupit ni Typhoon Tino sa Negros Island Region (NIR) sang nagligad November 2025.
Suno sa datos sini lang nga Lunes, nakalab-ot na sang 139,603 benepisyaryo halin sang 12 ka mga local government units (LGUs) ang nahatagan sugod sang Pebrero hasta Marso 7, 2026.
“This is equivalent to a 70.23 percent accomplishment rate. The ECT aims to help families meet their immediate and basic needs as they recover from the effects of disasters,” siling pa sang DSWD-NIR.
Ang tanan nga benepisyaryo nga naka-angkon sang severely damaged houses bangud sang bagyo nakabaton sang yara sa PHP10,325 kada isa, kag ang may slightly damaged houses makabaton man sang PHP5,369 kada isa.
Kaupod sang mga LGUs nga nahatagan ang Bago City, nga may yara 15,892 benepisyaryo nga nakabaton sang PHP93.268 million; Binalbagan, 11,403 benepisyaryo kag PHP62.288 million; Himamaylan City, 28,250 benepisyaryo nga nakabaton sang PHP151.674 million; Hinigaran, 22,972 benepisyaryo kag PHP138.933 million assistance; Isabela, 14,207 benepisyaryo kag PHP94.327 million assistance; kag La Carlota City, 15,097 nga mga benepisyaryo kag PHP92.201 million assistance.
Nakabaton man ang munisipalidad sang La Castellana nga may yara 17,511 benepisyaryo kag PHP100.122 million assistance; Moises Padilla, 2,149 benepisyaryo nga nakabaton sang PHP22.188 million; Pulupandan, 3,740 benepisyaryo kag PHP26.998 million nga assistance; San Enrique, 3,586 benepisyaryo kag PHP21.091 million assistance; Valladolid, 1,843 benepisyaryo kag PHP10.157 million assistance; kag ang Canlaon City, nga may yara 2,953 benepisyaryo nga nakabaton sang PHP18.374 million assistance.