Nagbuhay ang kadagatan sang Iloilo Strait samtang nagpalumba ang 41 ka makolor nga paraw sa highlight sang 53rd Iloilo Paraw Regatta Festival sang Marso 1, nga nagselebrar sang mayaman nga maritime heritage kag garbo sang mga Ilonggo.
Suno kay festival chairman John Lex Espinosa Bayombong, indi lamang ini isa ka palumba kundi isa man ka paghatag-pasidungog sa kaisog, abilidad kag tradisyon sang mga mangingisda kag mandaragat nga Ilonggo.
“Ang paraw indi lamang sakayan kundi simbolo sang resilensya kag buhi nga tradisyon sang aton pumuluyo,” siling ni Bayombong.
Ginpahayag man ni Iloilo City Mayor Raisa Treñas-Chu nga ang festival nagapakita sang pagbinuligay kag espiritu sang mga Ilonggo, kag ginpabutyag ang importansya sang kooperasyon sang gobyerno, pribado nga sektor kag komunidad.
Ang palumba nagtabok sang 26-kilometer nga ruta halin sa Villa Beach sa Arevalo, nga ginlumbaan sang mga paraw nga may kadakuon nga 25 tubtob 40 feet.
Gani, ginpasadya man sang nag-attend ang iban pa nga aktibidad pareho sang “Best Tasting Lechon” kag “Pinta Tawo” body art competition. Suno sa mga organizer, kapin 6,350 ka katawohan ang nagtambong sa main events sang festival.
Source: PIA IloIlo