Naghahanda ang Philippine National Police (PNP) para sa posibleng pag-isyu ng Interpol Red Notice laban kay dating presidential spokesperson Harry Roque, na nahaharap sa kasong qualified human trafficking na walang piyansa at may kaugnayan sa POGO operations.
Ayon kay PNP acting chief Lt. Gen. Jose Melencio Nartatez Jr., naka-standby ang intelligence at tracker units habang mino-monitor ang pag-usad ng kahilingan ng pamahalaan sa Interpol. Inatasan din niya ang mga yunit na panatilihin ang koordinasyon sa Interpol National Central Bureau (NCB) sa Maynila.
Nauna nang kinumpirma ng PAOCC na naghain na ang pamahalaan ng formal request para sa Red Notice laban kay Roque, na iniuugnay sa operasyon ng Lucky South 99 POGO scam hub sa Porac, Pampanga kung saan 158 dayuhan ang nasagip mula sa umano’y torture, kidnapping at sex trafficking.
Tinutunton din ng PNP ang co-accused ni Roque na si Cassandra Ong, na napaulat na lumipad patungong Japan.
Mariin namang itinanggi ni Roque ang mga paratang at sinabing politically motivated ang kaso. Siya ay kasalukuyang humihingi ng asylum sa Netherlands.
Source: https://mb.com.ph/2025/11/24/pnp-prepares-as-govt-seeks-interpol-red-notice-vs-harry-roque