Ang tatlong rebeldeng nasawi sa engkuwentro laban sa puwersa ng pamahalaan sa Jaro, Leyte ay konektado sa pagpaslang sa isang sundalo noong 2023, ayon sa 8th Infantry Division (8ID) ng Philippine Army nitong Huwebes.
Kinumpirma ng PA na isa sa tatlong armas na nakumpiska sa lugar ng engkuwentro ang pagmamay-ari ni Pvt. First Class Aries Ampoan, 21, miyembro ng 14th Infantry Battalion na minaltrato at pinatay ng NPA noong Abril 2, 2023 sa kabundukan ng Abuyog, Leyte.
“Ang pagkakarekober sa kanyang armas ay mahalagang ebidensya na nag-uugnay sa napatay na mga miyembro ng NPA sa mga nagdaang engkwentro sa pagitan ng mga armadong grupo at puwersa ng gobyerno,” pahayag ng 8ID.
Natagpuan ang bangkay ni Ampoan ng mga coconut farmers noong Abril 9, 2023 sa Barangay Balocawehay, Abuyog, isang linggo matapos siyang sumali sa operasyon laban sa mga NPA.
Narekober ng mga sundalo ang kanyang baril matapos nilang halughugin ang lugar ng sagupaan sa bulubunduking bahagi ng Jaro noong Nobyembre 17, 2025.
Kinilala ang mga nasawing rebelde bilang sina squad leader Fidel Lagado, alyas Rod/Jason; medical officer Maricel Anora, alyas Yenyen/Gani; at political guide Jun Berino, alyas Sonny/Danny.
Bilang pagtupad sa International Humanitarian Law (IHL), pinangasiwaan ng 8ID ang maayos na turnover ng mga labi ng mga napatay na rebelde sa kanilang pamilya at inayos ang pagpapalibing sa mga naturang rebelde sa pakikipagtulungan sa lokal na pamahalaan ng Jaro.
“Our commitment goes beyond securing communities; it extends to upholding IHL and pursuing justice for our fallen soldiers. This encounter brings undeniable clarity to the heinous nature of the enemy we face and provides crucial accountability for their crimes,” pahayag ni 8ID commander Maj. Gen. Adonis Ariel Orio.
Ayon sa PA, ang pagkamatay ng isang squad leader at dalawang kasamahan nito ay malaking dagok sa operasyon ng NPA sa Leyte.
Panulat ni Jay
Source: Philippine News Agency