Hindi bababa sa 30 aplikasyon para sa amnestiya ang inendorso ng Local Amnesty Board (LAB) sa Lungsod ng Catbalogan, Samar upang resolbahin ng pambansang pamahalaan.
Bunga ito ng patuloy na mga case conference ng mga miyembro ng LAB Catbalogan mula sa iba’t ibang ahensya simula pa noong nakaraang taon.
Ang mga inendorsong resolusyon ng LAB ay ipapasa sa executive committee ng National Amnesty Commission (NAC) bago ito tuluyang resolbahin ng en banc.
“Ipapaabot ang mga resolusyon sa Tanggapan ng Pangulo. Tanging ang Pangulo ng Republika ng Pilipinas lamang ang may kapangyarihang magkaloob o tumanggi sa amnestiya,” ayon sa pahayag ng LAB Catbalogan nitong Biyernes, Mayo 2, 2025.
Mula nang simulan ng pamahalaan ang pagtanggap ng aplikasyon para sa amnestiya noong Disyembre 2024, hindi bababa sa 378 dating kasapi ng New People’s Army mula sa tatlong lalawigan ng Samar ang nagsumite ng kanilang aplikasyon sa LAB Catbalogan.
Kabilang sa mga miyembro ng LAB Catbalogan sina Col. Eric Antonieto Mendoza, Director ng Samar Provincial Police Office; Golda Meir Tabao na kumakatawan kay LAB Chairperson Governor Sharee Ann Tan; Regional Prosecutor Irwin Maraya; Provincial Prosecutor Luz Lampasa mula sa Department of Justice–National Prosecution Service; Col. Carmelito Pangatungan, Deputy Brigade Commander ng Army 801st Brigade; at mga abogado mula sa Public Attorney’s Office.
Ayon sa NAC, sa pamamagitan ng amnestiya, binibigyan ng pamahalaan ang mga dating rebelde ng pagkakataong mapabuti ang kanilang pamumuhay.
Saklaw ng amnestiya ang mga krimeng may kinalaman sa rebelyon, ngunit hindi kabilang dito ang mga pribadong krimen tulad ng panggagahasa.
Alinsunod sa Proclamation 404 ni Pangulong Ferdinand R. Marcos Jr., na kilala rin bilang Amnesty Program, may panahon ang mga dating kasapi at kasalukuyang kasapi ng mga grupong komunista hanggang Marso 14, 2026 upang magsumite ng kanilang aplikasyon.
Hindi limitado ang programa sa mga rebeldeng NPA, kundi saklaw din nito ang mga kasapi ng Communist Party of the Philippines at ng National Democratic Front.
Source: PNA