Naaresto ang isang lalaki matapos umanong maghagis ng bag na naglalaman ng iligal na droga sa compound ng Tacloban City Jail noong ika-6 ng Oktubre 2024.
Sa paunang imbestigasyon, kinilala ang suspek na si alyas Dan, 32 taong gulang, residente ng Reclamation area ng Tacloban City at dati nang naging bilanggo sa Tacloban City Jail.
Napansin ng mga guwardiya ng BJMP sa Tower 1 at Tower 2 ng bilangguan ang isang purple na eco-bag na inihagis mula sa compound ng Department of Agriculture na katabi ng bilangguan.
Natagpuan ang bag sa lugar ng kusina ng bilangguan, ngunit wala na ang mga laman nito. Napansin ng mga guwardiya na ang lalaki ay naghahanda nang maghagis ng isa pang bag, ngunit nang makita siya ng mga personnel ng BJMP, hindi na siya nagpatuloy sa kanyang ikalawang pagtatangkang paghahagis. Agad na nilapitan ng mga guwardiya ang lalaki upang magtanong, ngunit bigla siyang tumakas.
Naaresto ang suspek ng mga awtoridad sa Burgos St., malapit sa Mormons Church. Sa presensya ng mga opisyal ng barangay at media, sinuri ang suspek, at dalawang sachet ng hinihinalang shabu na may timbang na .02 gramo at nagkakahalaga ng dalawang libong piso ang natagpuan sa kanyang pagmamay-ari.
Dinala ang suspek sa Police Station 2 para sa nararapat na proseso at kasong isasampa laban sa kanya.
Panulat ni Cami