Sinabi ng pamahalaang panlalawigan ng Leyte na ang bagong-renobadong MacArthur Landing Memorial National Park ay bubuksan sa publiko sa Oktubre 20, bilang bahagi ng paggunita sa ika-80 anibersaryo ng Leyte Gulf Landings.
Ayon kay Gobernador Carlos Jericho Petilla, ang maintenance at rehabilitasyon ng parke na pinondohan ng lokal na pamahalaan, na nagsimula noong Hunyo 13, ay nasa tamang takbo.
“Ang plano ay siguraduhing magiging operational ito sa Oktubre 20. Nadidismaya ang mga tao na ito ay sarado, ngunit ginagawa naming sulit ito para sa aming mga bisita,” pahayag ni Petilla sa mga mamamahayag nito lamang Martes, Oktubre 1, 2024.
Idinagdag ng gobernador na ang renovation ng parke ay kanilang pangunahing prayoridad dahil itinuturing itong isang pangunahing atraksyon para sa mga bisita at lokal na residente.
“Nais naming makahatak ng mas maraming turista. Gagawin naming isang sulit na destinasyon ito dahil magkakaroon ng mga restawran, iba pang pasilidad ng parke, at mga lawa,” dagdag niya.
Ang MacArthur Landing Memorial National Park ay matatagpuan sa isang 6.78-hektaryang lupain sa barangay Candahug sa Palo, Leyte. Nagtatampok ito ng pitong double-life-size bronze statues sa isang artipisyal na pool, na naglalarawan sa pagbabalik ni Heneral Douglas MacArthur sa Leyte.
Idineklara ang MacArthur Park bilang pambansang parke noong Hulyo 12, 1977 sa pamamagitan ng Letter of Instructions No. 572 na nilagdaan ng noo’y Pangulong Ferdinand Marcos.
Ito ang lugar kung saan dumating si Heneral Douglas MacArthur noong Oktubre 20, 1944, sa panahon ng pinakamalaking labanan sa dagat ng Ikalawang Digmaang Pandaigdig, na nagresulta sa pagsuko ng Japan matapos ang halos tatlong taong okupasyon sa Pilipinas.
Sa taong ito, ang lalawigan ng Leyte ay magdiriwang ng ika-80 anibersaryo ng makasaysayang kaganapang ito.
“Hindi ito magiging malaking selebrasyon. Ang aming layunin ay magbigay-gunita, at sa ilang antas, ito ay mapapansin. Nais naming tiyakin na ang mga tao ay patuloy na makaalala,” pahayag ni Petilla.
Noong Oktubre 20, 1944, si MacArthur, kasama sina Pangulong Sergio Osmeña at Heneral Carlos P. Romulo, ay muling bumalik sa Pilipinas, ang kanilang unang pagbalik matapos silang umalis sa Corregidor noong 1942.
Ang kanilang pagdating ay nagpasimula ng labanan na umabot sa 100,000 square miles ng dagat at nagtagal ng tatlong araw, mula Oktubre 23 hanggang 25, 1944, sa panahon ng pagsalakay sa Leyte ng mga puwersang Alyado.
Ang labanan ay nagmarka ng katuparan ng tanyag na pahayag ni Heneral MacArthur, “I shall return,” na kanyang sinabi sa Australia upang makakuha ng suporta mula sa mga Alyado sa layunin na iligtas ang Pilipinas mula sa okupasyon ng Japan.
Panulat ni Cami