Tatlong suspek ang arestado nang salakayin ng mga awtoridad ang isang drug den sa Purok 2, Barangay Cogon, Tagbilaran City, Bohol bandang 2:00 ng madaling araw noong Huwebes, Pebrero 8, 2024.
Ang anti-illegal drug operation ay isinagawa ng Philippine Drug Enforcement Agency (PDEA) Bohol Provincial Office, Maritime Police, Bohol Police Provincial Office at Naval Forces Central.
Ang mga naaresto ay ang hinihinalang drug den maintainer na si Sarah Jane Espejo, 29, sidewalk vendor, at ang kanyang live-in partner na si Nelmar Maputol, 39 at isa pa nilang kasama na si Anthony Baliling, 28, barbero.
Nasamsam sa operasyon ang walong pakete ng hinihinalang shabu na may kabuuang 11 gramo at may tinatayang market value na Php74,800, buy-bust money, cellphone at mga iba pang gamit.
Sinabi ni Leia Alcantara, Information Officer ng PDEA 7, na sinimulan nila ang pag-iipon ng kaso laban sa mga suspek sa loob ng dalawang linggo bago ang operasyon matapos makatanggap ng impormasyon tungkol sa kanilang aktibidad sa ilegal na droga.