Narekober ang isang bangkay ng pinaniniwalaang kasapi ng New People’s Army (NPA) malapit sa pinangyarihan ng sagupaan sa pagitan ng mga sundalo at rebeldeng grupo sa bulubunduking bahagi ng Lambunao sa Iloilo nito lamang Martes, Setyembre 19, 2023.
Ang naturang bangkay ay kasapi umao ng Baloy Platoon, Central Front Komiteng Rehiyon-Panay. Sinusubukan naman ng mga awtoridad na kunin ang pagkakakilanlan ng naturang nasawing rebelde na tinatayang nasa bente o mahigit pa lamang na taong gulang at may tangkad na nasa 5’4 o 5’5.
Natagpuan ang bangkay sa layong 700 metro lamang mula sa mismong encounter site sa Sitio Agdalusan, Barangay Jayubo ng nasabing bayan.
Samantala, kinumpirma naman ng mga sundalo na nasa sampung rebelde ang umatake sa kanila sa naturang lugar nitong Martes, na nagresulta sa engwkentro at agarang pagkamatay ni Private First Class Mars Echevarria. Habang sugatan naman ang isa pa nitong kasamahan na si PFC Joemarie Lleses.