Culaba, Biliran— Nauwi sa trahedya ang isang masayang inuman nang magkaroon ng alitan ang magkakaibigan sa Brgy Virginia, Culaba, Biliran noong Oktubre 2, 2022.
Kinilala ang biktima na si Arnel Rosales, 32, may asawa at residente ng Brgy Virginia, Culaba, Biliran at ang suspek na si Joven Mahinay alyas “Ente”, 36, may asawa, magsasaka at residente ng Brgy Calipayan, Culaba, Biliran.
Ayon sa imbestigasyon, sa kalagitnaan ng mainitang pagtatalo ng magkabilang grupo, sinuntok umano ng biktima ang suspek. Dahil sa galit, umuwi ang suspek at bumalik na dala ang kanyang homemade shotgun at agad niyang binaril ang biktima na tinamaan sa kaliwang bahagi ng kanyang katawan na nagresulta sa agaran nitong kamatayan.
Habang nagsasagawa naman ng hot pursuit operation ang mga awtoridad ay nakatanggap sila ng impormasyon na kusang sumuko ang suspek kasama ang kanyang homemade shotgun sa kanilang barangay official.
Inihahanda na ng mga awtoridad ang kasong murder laban sa suspek na pansamantalang nakakulong sa detention cell ng Culaba MPS.