Nagpahanumdom ang isa ka Public Health Expert sa publiko nga likawan ang paglusong sa tubig baha kasunod sa nagataas nga kaso sang leptospirosis sa pungsod.
Suno kay Dr. Philip Ian Padilla, Interim Dean sang UP Mindanao College of Medicine, iya ginpahayag nga ginadulian nga maglusong sa baha ilabi na kun may yara sang pilas sa tiil.
Dugang pa ni Padilla, kun kinahanglan gid maglusong sa baha, dapat magsuksok sang protective gear kaangay sang botas agud malikawan ang pagkontak sa kontaminado nga tubig.
Ginpahayag man sini nga ang leptospirosis naghalin sa ihi sang mga sapat, ilabi na sang mga ilaga, nga mahimo makakontamina sang tubig baha.
Base sa datos sang Department of Health (DOH), naglab-ot na sa 77% ang pagtaas sang kaso sang leptospirosis sa pungsod, nga katumbas sa 6,253 ka mga apektado kag 378 na ang napatay.
Source: Bombo Radyo Roxas