Nagpanguna ang Police Regional Office 6 (PRO6) sa may pinakamadamo nga naaresto nga pugante sa bug-os nga pungsod Pilipinas.
Ini ang base sa opisyal nga datus sang Philippine National Police (PNP) humalin sang Agosto 1 tubtob Agosto 31.
Nahibaluan nga nakarekord sang 29.56% nga overall performance rating ang PRO6 nga amo ang pinakamataas nga porsyento sa kabug-usan.
Base sa rekord, 328 ka pugante ukon wanted persons ang naaresto sang kapulisan sa Western Visayas nga ginalakipan sang 73 ka Most Wanted Persons kag 255 ka Other Wanted Persons.
Ang nasambit nga numero ang narekord batok sa monthly operational target nga 1,110 nga kaso, rason sang pagpanguna sang PRO6 sa national performance ranking.
Suno naman kay Regional Director, Brigadier General Randulf Tuaño, ang pagpanguna sang PRO6 ang epekto sang padayon nga police operations, disiplina sa operasyon, kag padayon nga pagbulig sang mga pumuluyo sa Region 6.
Samtang, ginahaylo ni Tuaño ang publiko nga padayon lang sa paghatag sang impormasyon nga makabulig sa pagtumod sang lokasyon sang mga pugante kag iya ginapasiguro ang safety sang tanan nga informant subongman sang publiko.
Source: K5 News FM