Ang pagpugong sa krimen dili lamang nagsugod sa presensya sa kapulisan sa kadalanan. Nagsugod kini sa usa ka komunidad nga nagpakabana, nagtinabangay, ug andam nga mobarog isip kabahin sa solusyon.
Mao kini ang sentrong mensahe sa 32nd National Crime Prevention Week (NCPW) nga pormal nga gilunsad sa National Police Commission (NAPOLCOM) Region VII atol sa kick-off ceremony nga gipahigayon sa Bohol Cultural Complex, Tagbilaran City niadtong, September 1, 2026.
Gisaulog matag unang semana sa Septyembre, ang NCPW- usa ka tinuig nga pahinumdom nga ang crime prevention dili lamang buluhaton sa law enforcement agencies, kundili usa ka collective responsibility nga nagkinahanglan sa aktibong partisipasyon sa gobyerno, komunidad, pribadong sektor, ug sa matag usa.
Gipahigayon ang selebrasyon ubos sa temang “Strengthening Civilian Oversight and Collective Action for Safer Communities,” nga naghatag og dakong gibug-aton sa papel sa katawhan isip aktibong kauban sa pagpalig-on sa kalinaw, kahapsay, ug seguridad sa matag komunidad.
Ang kalihukan gipangulohan ni NAPOLCOM Region VII Regional Director Atty. Leonora G. Bartolome, ug gitambongan ni Provincial Legal Officer Atty. Handel Lagunay, mga representante gikan sa nagkadaiyang ahensya sa gobyerno, force multipliers, ug mga kabatan-onan- lakip ang senior high school students ug student leaders gikan sa Bohol Wisdom School ug Holy Name University.
Mitambong usab si PCOL PATRICIO C. DEGAY JR., Provincial Director sa Bohol Police Provincial Office, nga mipadayag sa iyang mensahe sa suporta alang sa selebrasyon. Sa iyang mensahe, giawhag ni PCOL DEGAY JR ang mga kabatan-onan ug ang katawhan sa kinatibuk-an nga dili lamang mahimong observers, apan mahimong aktibong partners in crime prevention.
Gipasiugda usab niya nga ang usa ka luwas nga komunidad dili matukod pinaagi lamang sa kusog sa kapulisan, kundili pinaagi sa pagsinabtanay, pagtinabangay, ug pagpakabana sa matag usa.
Samtang, gipahinungod ni Atty. Bartolome ang iyang mensahe sa kamahinungdanon sa shared responsibility sa paglikay sa krimen ug pagmintinar sa kalinaw ug kahapsay.
Gipasiugda niya nga ang crime prevention dili eksklusibong responsibilidad sa kapulisan. Kini usa ka katungdanan nga gipaambit sa tanan- ug ang matag usa adunay papel nga mahimong parte sa solusyon.
Human sa Kick-off Ceremony, gisundan kini sa Youth for Peace Camp, usa ka makahuluganon nga kalihokan nga gitumong sa pagpalig-on sa partisipasyon sa kabatan-onan sa pagmintinar sa kalinaw sa komunidad.
Kabahin usab sa kalihokan ang serye sa mga lecture ug awareness drive nga gipahigayon sa nagkadaiyang ahensya sa gobyerno nga nag-una sa public safety. Pinaagi niini, gihatagan ang mga kabatan-onan og dugang kahibalo bahin sa paglikay sa krimen, personal nga kaluwasan, ug sa ilang importante nga papel isip kabahin sa usa ka luwas ug malinawon nga komunidad.
Ang 32nd NCPW nagsilbing panawagan alang sa mas lig-on nga panaghiusa tali sa kapulisan, local government units, national government agencies, force multipliers, civil society, komunidad, ug kabatan-onan.
Kay ang tinuod nga crime prevention dili lamang makita sa mga balaod nga atong gipatuman, kondili sa mga komunidad nga atong gitukod- komunidad nga alerto, responsable, nagtinabangay, ug nagpakabana.
Source: Bohol PNP