Naaresto ha San Miguel, Leyte an usa nga Overseas Filipino Worker o OFW nga wanted ha Sultan Kudarat tungod han kaso nga pagtalapas han Republic Act 9262 o Anti-Violence Against Women and Their Children Act of 2004.
Ginkilala an naaresto ha alyas “Rex,” 42 anyos, usa nga OFW ngan residente han Purok Langka, Brgy. Capilan, Lebak, Sultan Kudarat.
An pagdakop ginpangulohan han San Miguel Municipal Police Station o MPS, ha pagpanguna ni PLT Tyron Jayson S. Labordo, Officer-in-Charge, ha koordinasyon han Lebak MPS, Sultan Kudarat Police Provincial Office, ngan iba pa nga operating units.
Naaresto an suspek ha Brgy. Libtong, San Miguel, Leyte (dida han sabado) pinaagi han warrant of arrest nga iginpagawas han Presiding Judge han Regional Trial Court Branch 19, 12th Judicial Region ha Isulan, Sultan Kudarat.
An warrant in may kalabotan han Section 5(a) han RA 9262, nga mayda ginrerekomendar nga piyansa nga ₱72,000.
Gindara an naaresto ha San Miguel MPS para han dokumentasyon ngan angay nga disposisyon samtang ginhuhulat an iya pag-turnover ngadto ha korte.
Source: RMN Tacloban