Ginpatigayon sang Iloilo City Police Office ang pag-inspeksyon sa mga evacuation center kag ginpalig-on ang pagpreparar sang mga pulis sa posible nga emergency bangud sang pagbaha nga dala sang Southwest Monsoon ukon Habagat kag pagmonitor sa duha ka Low Pressure Areas (LPAs) sang Agosto 18, 2026.
Sa pagpanguna ni Police Lieutenant Colonel Ricardo B. Jomuad Jr., Officer-In-Charge sang Iloilo City Police Office, ginpabaskog ang police presence sa mga lugar nga naapektuhan sang pagbaha agud masiguro ang seguridad kag kaayuhan sang mga pumuluyo nga napilitan mag-evacuate.
Ginbisitahan man ni Police Major Shella Mae A. Sangrines, Acting Chief sang City Community Affairs and Development Unit (CCADU) kag Spokesperson sang Iloilo CPO, ang mga evacuees halin sa Barangay Balabago kag Barangay Calubihan sa Jaro, nga temporaryo nga ginpasagdan sa tagsa nila ka barangay chapel kag day care center.
Ginmonitor man ang mga residente sang Barangay Bakhaw sa Mandurriao nga yara sa Barangay Covered Gymnasium.Kabahin sang inspeksyon ang pag-usisa sa kahimtangan sang mga evacuees, paghibalo sang ila gilayon nga kinahanglanon, kag pagsiguro nga may police personnel nga preparado sa paghatag sang seguridad kag bulig.
Suno kay PLTCOL Jomuad, importante nga mabatyagan sang mga pumuluyo nga wala sila nagaisahanon sa tion sang kalamidad.“Sa panahon ng kalamidad, hindi lang tulong ang kailangan ng ating mga kababayan—kailangan din nilang maramdaman na hindi sila nag-iisa. Nandito ang Iloilo City PNP upang magbigay ng seguridad, kapanatagan, at agarang tulong sa oras ng pangangailangan,” siling ni Jomuad.
Padayon man nga ginapalig-on sang Iloilo City PNP ang koordinasyon sini sa City Disaster Risk Reduction and Management Office (CDRRMO) kag mga lokal nga opisyal, ilabi na sa pagpatuman sang mga preventive safety measures kag pagmonitor sang mga weather updates kag advisories sang PAGASA.
Samtang, naka-standby ang mga police personnel, lakip na ang Search and Rescue (SAR) teams, para sa posible nga rescue kag evacuation operations. Ginalauman man sila nga magbulig sa traffic management kag pagpanagtag sang mga public safety advisories, ilabi na sa mga lugar nga mataas ang posibilidad sang pagbaha.Gindirektahan man ang mobile patrol units nga magmonitor sa mga importante nga lugar kag maghatag sang gilayon nga bulig kon kinahanglanon.
Ginpanawagan sang kapulisan ang publiko nga magpabilin nga alerto, magsunod lamang sa opisyal nga impormasyon kag advisories, kag mag-report gilayon sang emergency paagi sa Iloilo City PNP hotline numbers nga 0908-377-0194 kag (033) 335-0299, ukon sa pinakamalapit nga police station.