Dead on arrival ha rural health unit an usa nga lalaki mahuman ini pagbun-on han iya kalugaringon nga tatay ha Sitio, Hambayan Brgy. Pacao, Villareal, Samar, kakulop han alas 5:50 han gab-i, July 22, 2026.
Ginkilala an biktima nga hi alyas “Ren,” 40-anyos nga embalmer, inasaw-an, ngan residwente han Brgy. Mahayag, Villareal, Samar.
Samtang an suspek liwat, nga tatay han biktima, in ginkilala ha alyas nga “Jov,” 72-anyos nga parag-uma, ngan residente gihapon han pareho nga barangay.
Ha inisyal nga imbestigasyon han mga otoridad, nag-iinom an biktima upod an iya mga amyaw ha Brgy. Mahayag, Villareal, Samar. Samtang ada ha impluwensiya hin makahurubog nga irimnon, nagkamayada hin mapaso nga argumento an biktima ngan an suspek.
Para naman makalikay ha dugang nga komprontasyon, ginsagdunan han asawa han suspek, nga nanay han biktima, an suspek nga pumakadto ha ira payag ha itio Hambayan, Brgy. Pacao, Villareal, Samar.
Peri kataliwan an pira ka minutos, sumunod an biktima ha suspek ha mao nga payag para ayaton ini hin away, ngan ginsugod ini gamit hin kahoy. Durante han komprontasyon, nahimo han suspek nga makuha an iya sundang ngan ginbuno an biktima ha tuo nga parte han iya liog, hinungdan han pag angkon hini hin grabe nga injury.
Nahimo pa han biktima nga makabaktas hin pira ka pitad tikang ha lugar para makapangaro hin bulig, kun diin usa nga alyas “Fritz” an nagdara ha iya ha RHU Villareal sakay hin motorsiklo, pero gindeklarar ini nga dead on arrival han nag atendir nga doctor.
Samtang, nakapailarom na ha kustodiya han Villareal Municipal Police Station an suspek mahuman ini maaresto pinaagi han ginbuhat nga hot pursuit operation.
Narekober gihapon pira ka metros tikang ha crime scene an armas nga mayada purluminos 65cm nga kahilaba, nga gin gamit han suspek ha biktima.
Source: RMN Tacloban