Waray nagin malinampuson an pagproyba pagkalagiw han usa nga lalaki mahuman ini maaresto han mga otoridad ngan makumpiskar tikang ha iya an iya diri lisensyado nga pusil ha ginbuhat nga operasyon ha usa nga Restobar ha Brgy. Poblacion Del Norte, Villaba, Leyte, gab-i han Hulyo 4, 2026.
Ginkilala an naaresto nga hi alyas “Fred,” 20-anyos nga watchman, residente han Brgy. Matolot, Leyte, Leyte. Hiya in naaresto tungod han pagtalapas han Republic Act No. 10591,o an Comprehensive Firearms and Ammunition Regulation Act, for illegal possession of firearms and ammunition.
Naduso an operasyon tikang ha sumat han tag-iya o manager han mao nga restobar nga naobserbaran hini an suspek ha sakob han CR nga pauro utro nga nagcha-chamber hin bala ha pusil.
Ha pag abot han mga nagresponde nga kapulisan ha lugar, ira naobserbaran an pagproyba han suspek nga makakalagiw tikang ha establisyemento sakay hin motorsiklo samtang gintatago an armas ha iya hawak ilarom han iya sweatshirt. Dayon nga napugngan han mga pulis an suspek antis pa ini makakalagiw.
Ha ginbuhat nga body search, narekober tikang ha suspek an usa ka yunit hin .45 caliber pistol nga kargado hin usa ka bala ha chamber, ngan usa ka magazine nga mayada pito ka bala hin .45 caliber. Waray naman may napresentar nga bisan ano nga legal nga dokumento sugad han firearm license o permit to carry firearm gawas han iya panimalay.
Ginbuhat naman an imbentaryo ha narekober nga armas ngan mga bala ha police station, ha atubangan han suspek mismo ngan barangay official, ha pagsunod han standard procedures. Samtang, igsusumiter an narekober nga pusil ha Regional Forensic Unit 8 para han pag eksamin ngan pag beripika, samtang gin aandam an pagpasaka hin kaangayan nga kaso ha korte para han pagtalapas han Republic Act No. 10591.
Source: RMN Tacloban