PROVINCE OF CEBU- Patay ang usa ka 63-anyos nga tricycle driver human kini gipusil sa duha ka wala mailhing lalaki nga nagsakay og motorsiklo sa tricycle terminal sa Legaspi Street, Barangay Poblacion, Dalaguete, alas 6:45 sa buntag kagahapon, Sabado, Hunyo 27, 2026.
Ang biktima giila nga si Reynaldo Mercado Amamangpan, 63 anyos, tricycle driver ug residente sa Sitio Guiwanon, Barangay Poblacion, Dalaguete.
Matud ni PMAJ Vincent Zozobrado, hepe sa Dalaguete Municipal Police Station, base sa pamahayag sa saksi nga si alyas Joshua, usa usab ka tricycle driver, nagtindog ang biktima duol sa iyang tricycle sa dihang miabot ang riding-in-tandem nga mga suspek.
Gituohan nga walay panaglalis nga nahitabo sa wala pa ang insidente, ug kalit lamang nga nibunot og armas ang backrider ug gipusil ang biktima, nga naigo sa dughan.
Human sa pagpamusil, dali nga miikyas ang duha ka suspek sakay sa ilang motorsiklo.
Gidala dayon ang biktima ngadto sa tambalan aron matambalan, apan gideklarar kining dead-on-arrival (DOA) sa doktor nga mitambong kaniya.
Padayon karon ang follow-up investigation sa Dalaguete Municipal Police Station aron mailhan ug madakpan ang mga responsable sa krimen.
Na-recover sa crime scene ang mga ebidensya lakip ang duha ka empty shell ug usa ka buhing bala gikan sa wala pa matino nga kalibre sa armas nga gigamit sa pagpamusil.
Source: Bombo Radyo Cebu