An mangunguha la unta hin pangti-on para ha ira pagkaon, in waray na kinabuhi nga gintapo han mga otoridad mahuman marekober an ira mga patay nga lawas tikang ha kadagatan. Ini an gin antos han magnanay ha katubigan han Barangay Balaquid, Cabucgayan, Biliran, gab-i han Hunyo 25, 2026.
Ginkilala an mga biktima nga hira alyas “Elsa,” 33-anyos, ngan an iya anak nga lalaki nga hi alyas “Dan,” 6-anyos, pareho mga residente han mao nga barangay.
Sumala ha Coast Guard Station (CGS) Biliran, banda alas 8:30 han gab-i han mahitabo an insidente, kun diin nagpadagat an mga biktima para mangolekta hin pangti-on para ha ira pagkaon.
Nagawas ha inisyal nga imbestigasyon nga tigda kumusog an sulog ngan dumako an mga balud nga nagdara ha ira ngadto ha mas hilarom nga katubigan.
Pag abot han mga otoridad para magresponde ha lugar banda alas 8:45 han gab-i, nakompirma han responders nga narekober na an lawas han nanay, ngan mas pinahugot an search and rescue operations para han iya liwat nawawara nga anak, kun diin banda alas 9:02 han gab-i na ini narekober.
Ginturn over an mga patay nga lawas han biktima ha mga barangay officials banda alas 10:30 han gab-i para han sakto nga disposisyon.
Pahimatngon naman han mga otoridad ha publiko nga panginanuon anay an kondisyon han panahon antis magbuhat hin aktibidad ha katubigan, maglikay paglangoy ha makusog nga katubigan, ngan bantayan hin mahugot an kabataan, ngan dayon nga magsumat ha mga kaangayan nga otoridad ha panhon hin mga emergency.
Source: RMN Tacloban